جـيـتـك أعــانـــــي

 

جيت متعذب أعاني وأنا لولاك و الله ماعانيت

 جيت أدوّر في ظـــــــلام الحب صدر يضمّني.

جيت.. وأحلامـــي كبيره جيت لاكنّــــي بكيت

 يوم قلبك شافنــي ميّت عليــــه وردّنـــي.

بعتني بأرخص ثمن رغــم انّي اقبلت وشريت

 بعتنـــــي وللحين مدري ليه أصـــــــلاً بعتني.
ما جرحــت ولا فضحــت ولا تعدّيــت وخطيـت

 كلّ مافي السالفه أحســـاس يمّـــك شدّنـي.

كنت لو تطلب عيونــــي قلت خذها يا فديت

 ولو طلبت الروح اقدّمهــا عشانــك تهتـني.

سمّني مجنونك أو عاشق عيونــك لو بغيت

 المهم أبقى معـــك دوم وبكيفــــــك سمّـني.

ليـــه طيّب ماتبينــي وأنت خابرنـــي وفيت

 ليش تتجاهل شعوري وأنت عـــارف معدني.

تحرق اعصاب القصيد اللي على وصفك بنيت

 كلّ همّــك ينكســـر ذاك الشمـــوخ وينحنـي.

ابتليت ايوالله انّـــي فـي محبتـــــك ابتليت

 وأغتربت وكانت احضانك ملامــح موطنـي.

وأنصدمت ومــــــات فيني حلم يـوم انّي دريت

 انّك آخــر شخص ممكن في الوجـود يحبّـني