قلت الوداع و جاوبت دمعة العين
تجرح بساتين الخدود النديه؟؟؟
و شفت بعينها الحزن حزنين
وصاحت على الفرقا...انا مو قويه
و جاوبتها ارجوكِ تكفين تكفين
والله دمعك يشعل النار فيّه
وقالت تعاهدني عهد المحبين
الله يخون اللي يخون بحبيبه
قلت ابشري واللي خلقك لاتظنين
حرام ما غيرك عشقت انسيه
وقصت شعرها قلت انا شتسوين
قالت ابي من غرتي لك هديه
ونادتني الغربه على الهم و البين
واحسب ان الايام روحه وجيه
غربة سنه في ذمتي غربة سنين
متى على الله يلتقي الحي حيه
و رجّعت شوقي في قلبي براكين
ورجعت انا كلي لها جاذبيه
وكل نثر داخل العين ميّه
وفي وسط حزني تلقيت رمحين
قالوا ماتت ... غافلتها المنيه
وفي غرغرتها ماذكرت غير حرفين
تشهدت باسمك شفاة البنيه
صدمه وجابتني على الارض نصفين
شلون راحت دون ذنب و خطيه
تكفون دلوني على القبر هالحين
ما عاد فيني للصبر مقدره
ووقفت اطالع قبرها بين نصبين
وجلست اضم اغلى النصايب عليّه
واصيح وش بك يا غلا ماتردين
اشتقت همس شفافك النرجسيه
إش فيك جيت من السفر ماتسلمين
ماهي بعادتك ولا انتي رديه
و حاولت في لحظة جنون اجرح الدين
و ازيح تربة قبرها في يديه
و بالغصب شالوني حشا تقول مسكين
و اصرخ بهم ... والله والله حيّه
وقفت وتاهت بي جميع العناوين
و الحزن يلعب في داخلي سامريه
و رجعت لدروب الشقا قبل عامين
مدري من اللي فينا صار الضحيه
ليست هناك تعليقات:
إرسال تعليق